ЕАТынын өз ара баалоосунун 3-раундуна даярдык көрүүнүн алкагында артыкчылыктуу мыйзам демилгелерин талкуулоо

2025-жылдын 26-декабрында Кыргыз Республикасынын Финансы министрлигине караштуу Финансылык чалгындоо мамлекеттик кызматынын (ФЧМК) жыйындар залында ченемдик укуктук актылардын (ЧУА) долбоорлорун иштеп чыгуу боюнча ведомстволор аралык жумушчу топтун биринчи жыйыны болуп өттү.

Жыйынга Кыргыз Республикасынын укук коргоо жана көзөмөл органдарынын өкүлдөрү катышты. Күн тартибиндеги негизги маселе - Кылмыштуу кирешелерди легализациялоого жана террористтик ишти каржылоого каршы аракеттенүү боюнча улуттук тутумду чыңдоого багытталган иш-пландын жана мыйзам долбоорлорунун концепцияларын талкуулоо болду.

Жолугушуунун жүрүшүндө белгиленгендей, өз ара баалоонун 3-раундунан өтүүнүн алкагында ЧУАларды иштеп чыгуу үч негизги блок боюнча жүргүзүлөт:

• Кылмыш-жаза жана кылмыш-жаза процессуалдык мыйзамдарын өркүндөтүү;
• Административдик жоопкерчилик чараларын күчөтүү жана юридикалык жактарды жөнгө салуу механизмдерин өркүндөтүү;
• Экономиканын өзгөчө секторлорун, анын ичинде товардык биржалардын ишин жөнгө салуу.

Жумушчу топ мүчөлөрүнүн ыкчам өз ара аракеттенүү механизмдерине өзгөчө көңүл бурулду. Бекитилген тартипке ылайык:

• Бардык даярдалган документтердин долбоорлору ФЧМКда милдеттүү түрдө алдын ала баалоодон өтөт.
• Ички макулдашуудан кийин долбоорлор ФАТФтын эл аралык стандарттарына шайкештигин тастыктоо үчүн ЕАТ Катчылыгына жөнөтүлөт.
• Толуктап иштеп чыгуунун чектелген регламенти белгиленген: макулдашуу учурунда алынган сын-пикирлер жана сунуштар Жумушчу топтун мүчөлөрү тарабынан 3 жумушчу күндүн ичинде иштелип чыгышы керек.

Бул чаралар ченемдик базаны даярдоонун жогорку сапатын жана финансылык коопсуздук чөйрөсүндөгү Кыргыз Республикасынын эл аралык стандарттарын өз убагында аткарууну камсыз кылууга багытталган.

Иш-планга ылайык, жалпысынан 22 ЧУА долбоорун жана 5 колдонмону иштеп чыгуу зарыл.